مساء الخير .. صباح النور
النهاردة قريت ف الجرنان خبر .. واحد (مختل عقليا) فى قنا طلعت ف دماغه عالفجر كدة انه يهجم على جيرانه بفأس و الناس دول و عددهم 6 فى المستشفى ف حالة خطرة حاليا
و تحتيه علي طول خبر تانى بان (مختل عقليا) فى سوهاج ربط مراته بالجلبية بتاعتها و راح حادفها من فوق سطح بيتهم!! ببساطة كدة .. ماهو مختل بقى
ده طبعا غير سلسلة القتل اللى حصلت السنين اللى فاتت و اللى كان اخرها حادث بنى مزار .. و القاتل كالعادة مختل عقليا
ده بالنسبة للبنى ادمين
بالنسبة للجماد ف اى حريق بيحصل حاليا بيكون السبب ماس كهربائى و طبعا ده بقى سبب حصريا بعد ما كان ف الاول السبب بيكون انفجار انبوبة بوتاجاز .. و طبعا 85% من الشعب بقى عنده غاز طبيعى دلوقتى ف بقى ده سبب قديم
من الاخر ... امتى بقى نقبض على المختلين عقليا و على الماس الكهربائى و نحاكمهم و نعدمهم كمان عشان نرتاح من قرفهم؟... و بدل مانخليهم شماعه نعلق عليها اخطاءنا
نلتقى بعد شوية
No comments:
Post a Comment