صباحو دمار

يا بورصاتك يا امريكا .. يا فياضاناتك يا جزائر ... يا حرايقك يا مصر

ولسة اللى يعيش ياما هايشوف... هو ايه اللى بيحصل يا جدعان؟

أمريكا.. 4 بنوك فلّسو و البورصة وقعت و النتائج ان العالم كله على حافة الانهيار و مصر لحد دلوقتى وصلت خسائرها 63 مليار جنيه فقط جارى الزيادة

الجزائر.. الناس قامت من النوم لقو نفسهم عايمين على مية ارتفاعها وصل 8 متر فقط .. يعنى طبعا اطول بنى ادم ف العالم مايقدرش يفرد طوله و ف النهاية الموضوع وصل لـ 8 ولايات و ناس كتير ماتت وناس اكتر اتشردت

واخيراً مصر .. من حريق مجلس الشورى لحريق المسرح القومى لحريق مصنع الغزل و النسيج و مصنع شيبسى و 6 مصانع اخرى .. ده حتى الان

وف النهاية بجد هارجع تانى و أسأل .. هو فى ايه؟ - هى القيامة قامت ولا لسة؟

اعتقد اننا المفروض نتلم كلنا كدة بربطة المعلم و نروح على مكان محايد .. فليكن المريخ و نصلى التهجد و ييجى بقى كل الرؤساء المتضررين و الوزراء والمسئولين يحضرو الصلا و ف النهاية ييجى الشيخ محمد جبريل يدعى بكشف الغمة و ييجى الاستاذ عمرو خالد ويقترح بعض الاقتراحات المفيدة ويحاول يثبت ايمان الناس الموجودين يمكن الموضوع يتحل

او الاقتراح التانى اننا نتجمع كلنا ف مكان محايد برضه .. القمر مثلا و كونداليزا رايس تدى اشارة البدأ وبعدها نصوّت و نـ ولول وبعدين نحدف من القمر قنبلة نووية عالارض ندمرها و بعد 10 سنين كدة ننزل و نبدأ تانى من جديد

لو حد عنده اقتراحات اخرى يقولى

نلتقى ف الدمار القادم

و الله اعلم هانلتقى ولالأ