امبارح نزلت الشارع و قلت اشوف احتفالات شم الفسيخ
اكلم ف الناس حواليا ولا حد سامع و الدنيا بقت بطييخ
الناس طلعت من الصوامع و هات يا لعب و اكل و صريخ
الناس خلاص نسيت المواجع وبقت دماغهم ف المريخ
الاقى ناس بتضرب ف ناس .. أجى اسلللك يقولو ده هزار
و الاقى واحد على ضهر كلب .. اقوله سيب الكلب يقولى ده حمار
أقول للناس كفاية كدة ده الفسيخ ضار
يقولولى خدلك رغيفين و خليها عالستار
هاقول ايه بس..ربنا ما يحرمنا من شم الفسيخ
teef@
الثلاثاء 29-4-2008
جميع حقوق النشر محفوظة لكاتبها مصطفى سعد و كل من يقتبس او يحصل على أيا منها دونالرجوع لكاتبها يبقى ... حرامى و هايخش النار ان شاء الله
4 comments:
عندك حق يا تيفا
الناس ما بتصدق تلاقى حاجه تفرحها
اى مناسبه و خلاص
المسلمين و المسيحيين بيفرحوا فى اعياد بعض ... علشان الاجازات طبعا
و كمان اللى بياكلوا لحمه
هما عارفين انها لحمة حمير ... بس بردو مبسوطين
عجبى
مهو اي مناسبه واجازه لازما تستغل عشان مفيش غيرها كتير فالسنه
اكن مفيش فسيخ غير فاليوم دا
عشان بيبقي طعمو احلي
مع ان بتتطلع اشاعات كتيره انو فاسد والكلام دا
هو فعلا بيكون يوم عجيب بس يا تيفا انا من محبين الفسيح
لكن مبحبش الكلاب ههههههه
الجو بيكون يوم شم النسيم معبأ بالبصل والاكلات اللي مش مترابطه بس عادى اهو يوم الناس بتتلم فيه وتنسى اللي بيها
ودورى بينا يا دنيا
تحياتى ليك
نور
حمادزززز و النبى بلاش قرف عشان انا بقيت نباتى و مابقتش طايق اكل لحمة خلاص و بتلكك
اما جوجو ف كل سنة ف الجرايد لازم نقرا قبل شم النسيم عن ضبط 500 طن فاسدة الخ الخ و الناس بتاكل برضه
و اخيرا نور..حلوة معبأ بالبصل دى..ولو انى حاسس ان عنيا بتدمع عالسيرة ماتفهميش حساسية دى ولا ايه
نورتو يا جماعه و مورسييز على كلامكم
Post a Comment