حررش ولا تخونش 1

هو احنا سنة كام دلوقتى؟
حقيقى مش عارف الوقت اللى جرى ولا انا اللى برجع لورا على طريقة - السيارة ترجع الى الخلف
من حوالى 10 سنين ظهر لاول مرة مصطلح مزة
و ده على اى بنت شايفة نفسها شويتين مش هاقول حلوة يعنى بس هاقول معجبة بروحها شوية
و من وقتها و الشباب بقى ماصدق لقى كلمة و اختلطت الدنيا ف بعضها و بقت اى بنت مزة بما انها بنت يعنى
بعدها بدا الشباب يحور ف الكلمة و بقت سوززة و مؤؤة و دول اللى اقدر اكتبهم
لحد كدة و قلنا الحمد لله على كدة
المصيبة بقى ان البنات كمان قررت مؤخرا فى ال 3 سنين الاخيرة يطلقو نفس اللقب على الشباب
بمعنى انه بقى فيه مز دلوقتى مش مزة بس
حد فاهم حاجة؟
بشكل تانى.. الولاد دلوقتى بقو بينافسو البنات على اللقب و بقيت تمشى ف الشارع
تلاقى مزة على يمينك و مز على شمالك
تحول الشارع الى مسرح كبير يعلوه العديد من المزز بانواعهم
و بسم الله ماشاء الله تلاقى دلوقتى الولاد لابسة بلوزات قصدى تى شيرتات بمبى و حمرا و بترتر
و الحياة معاهم فللللل اوى ماهو الواد من دول بقى واد مز مش اى حاجة يعنى
و طبعا اللى ربنا اداله ف صدره شعرايتين فرحان بيهم و لازم يفتح التى شيرت لحد سررررته عشان
يبينهم - البركة ف الباشمهندس تامر حسنهم طبعا - ماهو اكيد مش حسنى انا
والله انا خايف بعد كدة امشى ف الشارع الاقى المسرح اتحول الى بنى ادمين ماشيين
من غير هدوه بدعوى الحر و قلة الامكانيات
او حتى قلة الادب
والله مافارقة
اخيرا ... الى كل شاب ناوى يكون اب او فييتاء ناوية تكون ام
ابوس ايديكم خدو بالكم من عيالكم
اخرة موضوع المزز ده منيل بنيلة
هاشرح بعدين ازاى منيل بنيلة
و كفاية التحرشات اللى مالية البلد
و على راى المثل
حررش ولاتخونش